Arraw n MASNSEN, poème de Oubellil

Arraw n MASNSEN

A tafat cedhant walen
Wissen dγa ma ad-kem-nẓar
Ay assirem deg ulawen
A win umi zin lesswar
Ay aveḥri id yesuḍen
Kked idurar d izuγar
Ini-as-en yiwen yiwen
I warraw n leğerğar
Ayen id ğan wid iruḥen
Ad tneḥrez as-neg leqrar
Ay amedyaz sakiten
S kra yellan d mmi-s nelḥar

Muqleγ, sakkdeγ timura
Yewwin avrid deg narni
Ma ruγ ihi yella kra
A yetma agdud neγ ur yelli
Marẓen iεegalen tura
Yal yiwen s anda yeγlli
Ayeni id teğğa lggirra
Ikkeml-it ujajiḥ n wass-agi
Muqar lehlak-is tulwa
Taqvaylit tenṭar t-ttwarwi
Meḍlentt ur temut ara
Yarna neḥdar maḍi

Iẓri y-munddel ur yettwali
Neγ iwala iεemed i tyita
Imi aka nemcengal d tirni
I tegmat i xrev uẓeṭa
D annect-a i ruğan imcumen-nni
Ḍemεen ad dmen lγella
Aεeqa n tidet ur yemγi
Deg akal hatan yerkka
Ihi ddem aγenja seqi
Yak yarmed sekksu lfetna
Tikkelt-a tugar-itent arkelli
Lzzayer ad tarew kra

Fukkent tira ay imru
Tiktiwin ayalaγ ikerssen
Fkkan afus wat ddeεwesu
D gir amdun id ugmen
Flan d flan la ifetu
D netta kkan ara d tijevren
Fran suq nekkni ur n teddu
Nuggi talava iγ-sarssen
Γef tuyat γas ẓay uzaglu
Γurwat iḍaren ad feclen
Anareẓ wala aneknu
Ay arraw n Masnsen...

UBELLIL